ශ්‍රී ලංකාවේ මාර්ග ජාලයේ ඓතිහාසික සංවර්ධනය යටත් විජිත යුගයේ සිට ආරම්භ වූ අතර, කොළඹ වරායට තේ, කෝපි වැනි කෘෂිකාර්මික නිෂ්පාදන ප්‍රවාහනය කිරීම සහ පරිපාලනය හා ආරක්ෂාව සඳහා මාර්ග ඉදිකිරීම් ආර්ම්භයේදී සිදු කරන ලදී. මුල් කාලයේදී මාර්ග සතුන් ඇදගෙන යන කරත්ත සඳහා නිර්මාණය කළ අතර, 1940 ගණන්වලදී මෝටර් රථ පැමිණීමත් සමඟ මාර්ග පද්ධතිය වැඩිදියුණු කිරීම අවශ්‍යවිය.

1989 ආණ්ඩුක්‍රම ව්‍යවස්ථාවේ 13 වැනි සංශෝධනය යටතේ පළාත් සභා පද්ධතිය ආරම්භ කරනු ලැබීමත් සමඟ උතුරු මැද පළාත් සභාවට මාර්ග විෂය සම්බන්ධ කටයුතු ද පැවරුණි. ඒ අනුව පළාත් මහා මාර්ග දෙපාර්තමේන්තුව යටතේ පළාතේ මාර්ග සංවර්ධන කටයුතු සිදුවූ අතර එහි කටයුතු පළාත් සභාව යටතේ ම සිදු විය..

1998 අංක 01 ප්‍රඥප්තිය මගින් උතුරු මැද පළාත් මාර්ග සංවර්ධන අධිකාරිය (NCPRDA) ස්ථාපිත කරන ලද අතර, එය 2001 ජනවාරි පළමුවන දා සිට ක්‍රියාත්මක වේ. මෙම අධිකාරිය උතුරු මැද පළාතේ මාර්ග විෂය භාර අමාත්‍යාංශය යටතේ පවතින ව්‍යවස්ථාපිත ආයතනයක් වන අතර, සභාපතිවරයා ප්‍රමුඛ අධ්‍යක්ෂ මණ්ඩලයක් සහ සාමාන්‍යාධිකාරීවරයෙකුගේ ප්‍රධානත්වයෙන් පරිපාලන හා මෙහෙයුම් කටයුතු මෙහෙයවයි.

අද වන විට, අධිකාරියේ ප්‍රධාන කාර්යාලය අනුරාධපුර නගරයේ පිහිටා ඇති අතර, මාර්ග කටයුතු අනුරාධපුර හා පොළොන්නරුව දිස්ත්‍රික්කවල පිහිටි විධායක ඉංජිනේරු කාර්යාල 06 ක් මගින් මෙහෙයවනු ලබයි.